لاہور: انسدادِ دہشت گردی عدالت (اے ٹی سی) لاہور کی خصوصی عدالت نے 9 مئی کے عسکری ٹاور حملہ کیس میں اہم پیش رفت کرتے ہوئے خدیجہ شاہ سمیت چار ملزمان کو اشتہاری قرار دے دیا ہے۔
اے ٹی سی کے ایڈمن جج منظر علی گل نے کوٹ لکھپت جیل میں کیس کی سماعت کی، جہاں ملزمان کی مسلسل غیر حاضری پر عدالت نے سخت کارروائی کا حکم دیا۔ عدالت نے خدیجہ شاہ، حمزہ سہیل، عثمان اسلم اور احمد مرسلین کے دائمی وارنٹِ گرفتاری جاری کرتے ہوئے انہیں اشتہاری قرار دے دیا۔
سماعت کے دوران سرکاری وکیل نے عدالت کو بتایا کہ نامزد ملزمان ٹرائل میں پیش نہیں ہو رہے۔ پراسیکیوٹر کے مطابق خدیجہ شاہ 9 مئی کے ایک مقدمے میں سزا کے بعد روپوش ہے، جس کے باعث عدالت سے انہیں اشتہاری قرار دینے کی استدعا کی گئی۔
عدالت نے دلائل سننے کے بعد استدعا منظور کرتے ہوئے متعلقہ ملزمان کے خلاف قانونی کارروائی تیز کرنے کا حکم دیا۔
اسی کیس میں عدالت نے ملزم زین الحسن کے ناقابلِ ضمانت وارنٹِ گرفتاری بھی جاری کر دیے ہیں۔
عدالتی احکامات کے بعد قانون نافذ کرنے والے اداروں کو اشتہاری قرار دیے گئے ملزمان کی گرفتاری کے لیے اقدامات تیز کرنے کی ہدایت کر دی گئی ہے
