دنیا کے مقبول ترین ٹک ٹاک اسٹار خابی لامے نے اپنی ذاتی کمپنی ’اسٹیپ ڈسٹنکٹیو لمیٹڈ‘ تقریباً 975 ملین ڈالرز میں فروخت کر دی ہے۔ یہ کمپنی خابی لامے کے عالمی برانڈ، کمرشل معاہدوں اور تجارتی سرگرمیوں کو سنبھالتی تھی۔
غیر ملکی خبر رساں ادارے بلومبرگ ڈاٹ کام کے مطابق خابی لامے کی کمپنی ہانگ کانگ کی پبلک لسٹڈ ہولڈنگ کمپنی ’رِچ اسپارکل‘ نے خریدی ہے۔
چینی کمپنی کو خصوصی آپریٹنگ اختیارات
معاہدے کے تحت چین کی لائیو اسٹریمنگ اور ای کامرس کمپنی انہوئی ژیاؤہیانگ نیٹ ورک ٹیکنالوجی اگلے 36 ماہ تک خابی لامے کے عالمی کمرشل منصوبوں کی خصوصی آپریٹنگ پارٹنر ہوگی۔
کمپنی کی جانب سے جاری بیان میں دعویٰ کیا گیا ہے کہ خابی لامے کی عالمی فین بیس کی بنیاد پر سالانہ 4 ارب ڈالرز سے زائد کی فروخت متوقع ہے، جس کی بڑی مارکیٹس امریکا، مشرقِ وسطیٰ اور جنوب مشرقی ایشیا ہوں گی۔
AI ڈیجیٹل ٹوئن کی تیاری
معاہدے کے ایک اہم نکتے کے مطابق خابی لامے نے اپنی فیس آئی ڈی، وائس آئی ڈی اور مخصوص اشاروں پر مبنی ڈیٹا کو آرٹیفیشل انٹیلی جنس (AI) ڈیجیٹل ٹوئن بنانے کے لیے استعمال کرنے کی اجازت بھی دے دی ہے، تاکہ مختلف زبانوں میں سوشل میڈیا مواد تیار کیا جا سکے۔
خابی لامے کون ہیں؟
سینیگال نژاد اطالوی ٹک ٹاک اسٹار خابی لامے کے ٹک ٹاک پر تقریباً 161 ملین جبکہ انسٹاگرام پر 77 ملین سے زائد فالوورز ہیں، جو انہیں دنیا کا سب سے زیادہ فالو کیا جانے والا ٹک ٹاک کریئیٹر بناتے ہیں۔
خابی لامے بغیر بولے، سادہ مگر انتہائی مزاحیہ انداز میں پیچیدہ لائف ہیکس کا مذاق اڑانے کے لیے مشہور ہیں، جس نے انہیں عالمی شہرت دلائی۔
انہوں نے کوویڈ-19 کے دوران فیکٹری کی نوکری ختم ہونے کے بعد سوشل میڈیا پر یہ منفرد مواد بنانا شروع کیا، اور بہت کم وقت میں دنیا کے بڑے برانڈز کے ساتھ کام کرنے لگے۔
ماضی کا تنازع
واضح رہے کہ خابی لامے گزشتہ سال امریکا میں ویزا مدت ختم ہونے کے باعث سوشل میڈیا پر خبروں کی زینت بنے تھے، جس کے بعد انہوں نے رضاکارانہ طور پر امریکا چھوڑ دیا تھا
