میاں نواز شریف کا کوٹ مومن کا جلسہ

کوٹ مؤمن میں جلسہ عام سے خطاب کرتے ہوئے سابق وزیراعظم نواز شریف کا کہنا تھا کہ یہ جلسہ نہیں بلکہ عدالتی فیصلے کے خلاف عوام کا فیصلہ ہے اور اللہ کی شان ہے۔

نواز شریف نے کہا کہ میں نے کرپشن کہاں کی ہے؟ اس کا جواب تو دینا پڑے گا اور بتانا پڑے گا کہ انہیں نااہل قرار دینا کیا صحیح فیصلہ ہے؟

انہوں نے کہا کہ ملک میں عوامی فیصلہ ہی راج کرے گا، اور ملک میں ’لاڈلے‘ کو کہیں جگہ نہیں ملے گی کیونکہ عوام جانتے ہیں کہ لاڈلے کے علاوہ اور کون کون سازشی ہے۔

انہوں نے کہا کہ نواز شریف کو عوام کی خدمت کا یہ صلہ دیاجارہا ہے۔

نواز شریف نے جلسہ عام سے خطاب کرتے ہوئے کہا کہ لاڈلہ قبول کرتا ہے کہ نیازی سروسز میری تھی، لیکن ’وہ‘ کہتے ہیں کہ نہیں تیری کوئی کمپنی نہیں ہے۔

سابق وزیر اعظم نے کہا ’دوسروں پر تہمتیں لگانے والے تم سب سے کرپٹ آدمی ہو اور تم نے اسپتال کا پیسہ جوئے میں لگایا۔‘

نواز شریف کا کہنا تھا کہ ان کی نااہلی کے بعد مہنگائی اور بے روزگاری نے سراٹھالیا، اور ملک میں انتشار بھی پھیل رہا ہے۔

ان کا کہنا تھا کہ ملکی ترقی کا سفر سست ہونے میں وزیراعظم شاہد خاقان عباسی کا کوئی قصور نہیں وہ تو نہایت جواں مردی سے عوام کی خدمت کر رہے ہیں۔

سابق وزیراعظم کا کہنا تھا کہ جو کام 20 سالوں میں نہیں ہوئے وہ مسلم لیگ (ن) کی حکومت نے صرف 4 سال کے قلیل عرصے میں کر کے دکھا دیئے۔

نواز شریف نے کہا کہ چار سالوں میں ملک کا رخ بدل دیا اور آج پورے ملک میں لوڈ شیڈنگ ختم ہوچکی ہے۔

نواز شریف نے جلسہ عام سے خطاب کے دوران عوام سے ان کی عدل بحالی تحریک میں ساتھ مانگ لیا۔