پولیس کے مطابق اداکار بابر علی کو نامعلوم افراد کی طرف سے دھمکی آمیز کالز موصول ہوئیں جس کے بعد نامعلوم افراد کیخلاف مقدمہ درج کرلیا گیا ہے۔
پولیس کا کہنا ہے کہ بابر علی کی جانب سے تھانہ ڈیفنس سی میں 16 نومبر کو مقدمہ درج کرایا گیا، جس کے بعد وہ غیر ملکی ائیر لائن کے ذریعے براستہ دوحا امریکا چلے گئے ہیں۔
ایف آئی آر کے مطابق ٹیلی فون کالز میں بابرعلی کو نامعلوم افراد کی جانب سے قتل کی دھمکیاں دی گئیں۔
بابر علی نے بیان میں کہا ہے کہ ایک ٹی وی ڈرامے کے نشر ہونے کے بعد دھمکیوں اور تعاقب کا سلسلہ شروع ہوا، انتہا پسند عناصر پاکستان میں فنکاروں کیخلاف بھی متحرک ہیں۔
بابر علی پاکستان فلم و ڈرامہ انڈسٹری کا بڑا نام ہیں جنہوں نے متعدد فلموں اور ڈراموں میں اداکاری کے جوہر دکھائے ہیں۔
ان کی فلموں میں ’جیوا‘، ’جو ڈر گیا وہ مرگیا‘، ’بے قابو‘، ’لخت جگر‘، یہ دل آپ کا ہوا‘ اور ’چور مچائے شور‘ سمیت متعدد فلمیں شامل ہیں۔
بابر علی نے چھوٹی اسکرین پر ’لنڈا بازار‘، ’مشال‘، ’مل کے بھی ہم نہ ملے‘ اور ’لعل عشق‘ جیسے ڈراموں میں کام کیا ہے۔
