لیفٹیننٹ جنرل احمد شریف چوہدری ڈائریکٹر جنرل انٹر سروسز پبلک ریلشنز نے اسلامیہ یونیورسٹی بہاول پور کا دورہ کیااور مرکزی آڈیٹوریم میں اسلامیہ یونیورسٹی بہاول پور اور بہاول پور ڈویژن کے دیگر تعلیمی اداروں سےآئے ہوئے فیکلٹی ، طلباوطالبات سے شاندار خطاب کیا۔ وائس چانسلر پروفیسر ڈاکٹر محمد کامران ، پرو وائس چانسلر پروفیسر ڈاکٹر عبدالرؤف ، سینئر فیکلٹی او طلباو طالبات نے ان کا پرجوش استقبال کیا۔وائس چانسلر پروفیسر ڈاکٹر محمد کامران نے ڈی جی آئی ایس پی آر لیفٹیننٹ جنرل احمد شریف چوہدری کو اجرک پیش کی۔ طلبا وطالبات نے ڈی جی آئی ایس پی آر لیفٹیننٹ جنرل احمد شریف چوہدری کو پھولوں کے گلدستے پیش کیے اور پھولوں کی پتیاں نچھاور کیں۔ ڈی جی آئی ایس پی آر لیفٹیننٹ جنرل احمد شریف چوہدری نے اپنے خطاب میں کہا کہ نوابین بہاول پور کی تحریک پاکستان اور استحکام پاکستان میں ریاست بہاول پور کی غیر معمولی خدمات ہیں۔ انہوں نے کہا کہ نواب آف بہاول پورنے تحریک پاکستان اور استحکام پاکستان کے بعد نوزائیدہ مملکت پاکستان کے لیے بے پناہ وسائل فراہم کیے۔ انہوں نے کہا کہ خطہ بہاول پور خاص طور پر اسلامیہ یونیورسٹی بہاول پور جو سو سالہ تاریخ کی حامل ہے پاکستان میں نوجوانوں کے لیے اعلیٰ تعلیم کا بہترین ذریعہ ہے۔ اس موقع پر انہوں نے قومی اور علاقائی صورتحال ، معرکہ حق بنیان المرصوص، پاک افغان تعلقات اور عالمی امن کے لیے پاک فوج کی غیر معمولی کردار پر تبادلہ خیال کیا۔ وائس چانسلر اسلامیہ یونیورسٹی بہاول پور پروفیسر ڈاکٹر محمد کامران نےکہا کہ ڈی جی آئی ایس پی آر لیفٹیننٹ جنرل احمد شریف چوہدری کی آمد اساتذہ اور طلباو طا لبات کے لیے پرمسرت موقع ہے۔ اسلامیہ یونیورسٹی بہاولپور پاکستان آرمی کے ساتھ سول آرمی اشتراک کے تحت مختلف قومی منصوبوں میں فعال کردار ادا کر رہی ہے۔انہوں نے خود نیشنل سیکورٹی ورکشاپ میں شرکت کی اور انہیں قومی سلامتی ، علم اور باہمی تعاون کو قریب سے سمجھنے کا موقع ملا۔ اسلامیہ یونیورسٹی بہاول پور میں پہلی ٹیک ایکسپو کے انعقاد میں بہاول پور کور کا تعاون اور قومی اداروں سے روابط سے جدید سائنسی تحقیق میں مدد ملی۔ اس موقع پر وائس چانسلر پروفیسر ڈاکٹر محمد کامران نے ڈی جی آئی ایس پی آر لیفٹیننٹ جنرل احمد شریف چوہدری کو سو سالہ تقریبات کی شیلڈ پیش کی۔ تقریب کے اختتام پر طلباو طالبات نے پاک فوج اور پاکستان زندہ باد کے فلک شگاف نعرے لگائے ۔ طلباو طالبات کی بڑی تعداد ڈی جی آئی ایس پی آر لیفٹیننٹ جنرل احمد شریف چوہدری کے پاس جمع ہو گئی اور سیلفی لیں اور انہیں تصاویر پیش کیں۔
