وزیراعظم پاکستان شہباز شریف نے کہا ہے کہ ان کا ڈیووس کا دورہ انتہائی کامیاب رہا اور امید ہے کہ غزہ میں جلد امن قائم ہوگا۔
لندن میں پاکستانی ہائی کمیشن کے باہر میڈیا سے گفتگو کرتے ہوئے وزیراعظم نے بتایا کہ پاکستان کو غزہ بورڈ آف پیس میں شمولیت کی دعوت دی گئی تھی، جس پر وفاقی کابینہ نے مشاورت کے بعد فیصلہ کرنے کا اختیار انہیں دیا۔ انہوں نے کہا کہ اس فورم کے ذریعے فلسطینی عوام کو عزت اور وقار کے ساتھ ان کے جائز حقوق ملیں گے۔
وزیراعظم شہباز شریف کا کہنا تھا کہ امریکی صدر ڈونلڈ ٹرمپ نے پاکستان کے لیے نیک تمناؤں کا اظہار کیا، جبکہ ان کی ملاقات ایم ڈی آئی ایم ایف کے ساتھ بھی شاندار رہی۔ انہوں نے بتایا کہ ایم ڈی آئی ایم ایف نے پاکستان کی معاشی اصلاحات کو سراہا ہے۔
وزیراعظم نے مزید کہا کہ پاکستان عالمی سطح پر امن، استحکام اور اقتصادی ترقی کے لیے اپنا کردار ادا کرتا رہے گا۔
واضح رہے کہ وزیراعظم شہباز شریف سوئٹزرلینڈ کے شہر ڈیووس میں عالمی اقتصادی فورم میں شرکت کے بعد لندن پہنچے تھے۔ ڈیووس میں انہوں نے عالمی اقتصادی فورم سے خطاب کیا اور امریکی صدر ڈونلڈ ٹرمپ کے ساتھ غزہ بورڈ آف پیس کے چارٹر پر دستخط بھی کیے۔
