افغانستان کے مختلف صوبوں میں شدید بارش اور برفباری نے تباہی مچا دی، برفانی تودے گرنے اور دیگر حادثات میں 61 افراد جاں بحق جبکہ 100 سے زائد زخمی ہو گئے۔
خبر ایجنسی کے مطابق افغان صوبوں پروان، وردک، جنوبی قندھار، شمالی جوزجان، فاریاب اور وسطی بامیان سمیت دیگر علاقوں میں بدھ سے جاری شدید بارش اور برفباری کے باعث 450 سے زائد مکانات مکمل یا جزوی طور پر تباہ ہو گئے ہیں۔
افغانستان کی نیشنل ڈیزاسٹر مینجمنٹ اتھارٹی کا کہنا ہے کہ شدید برفباری اور برفانی تودے گرنے کے خدشات کے پیش نظر اہم شاہراہیں اور بین الصوبائی سڑکیں بند کر دی گئی ہیں، جبکہ بڑی تعداد میں لائیو اسٹاک کے نقصان کی بھی اطلاعات ہیں۔
دوسری جانب پاکستان کے صوبہ خیبر پختونخوا میں بھی بارش اور برفباری کے دوران مختلف حادثات میں 9 افراد جاں بحق ہو گئے ہیں۔ صوبائی ڈیزاسٹر مینجمنٹ اتھارٹی (پی ڈی ایم اے) کے مطابق متاثرہ علاقوں میں امدادی کارروائیاں جاری ہیں۔
افغان محکمہ موسمیات نے خبردار کیا ہے کہ رواں ہفتے افغانستان کے مختلف حصوں میں مزید برفباری کا امکان ہے، جس کے باعث صورتحال مزید سنگین ہو سکتی ہے
