عام انتخابات میں دھاندلی کا الزام لگانے والے سابق کمشنر راولپنڈی لیاقت علی چٹھہ نے اپنے الزامات پر شرمندگی کا اظہار کرتے ہوئے معافی مانگ لی۔
لیاقت علی چٹھہ نے الیکشن کمیشن میں اپنا بیان ریکارڈ کراتے ہوئے کہا ہے کہ غلط الزامات لگانے پر معذرت خواہ ہوں۔
اپنے بیان میں انہوں نے کہا ہے کہ ایک سیاسی جماعت کے رہنما کے کہنے پر یہ پلان ترتیب دیا گیا تھا۔ میں نے 11 فروری کو خفیہ طور پر لاہور جا کر سیاسی رہنما سے ملاقات بھی کی۔
لیاقت چٹھہ نے کہا ہے کہ چیف جسٹس کا نام جان بوجھ کر شامل کیا گیا، جس کا مقصد عوام میں نفرت بھڑکانا تھا۔ میں نے منصوبے کے مطابق خود کشی اور پھانسی پر لٹکا دو جیسے جملے استعمال کیے۔
لیاقت چٹھہ نے کہا ہے کہ مجھے سیاسی رہنما نے الیکشن کو دھاندلی زدہ ثابت کرنے کے منصوبے پر کام کرے کا کہا، مجھے کہا گیا تھا کہ آپ کو بدلنے میں اعلیٰ عہدہ دیا جائے گا۔
انہوں نے کہاکہ میں نے استعفے کا آپشن استعمال کرنے کا مشورہ بھی دیا تھا۔ لیکن کہا گیا کہ اس کا زیادہ اثر نہیں ہوگا۔
لیاقت چٹھہ نے کہا ہے کہ مجھے کسی نے بھی دھاندلی کی کوئی ہدایت نہیں کی۔ کوئی بھی آر او ایسے کسی بھی عمل میں ملوث نہیں تھا۔
انہوں نے کہاکہ میں نے جو کچھ کیا اس پر بہت شرمندہ ہوں۔ اور اس پر پوری قوم سمیت سرکاری ملازمین سے معذرت چاہتا ہوں۔
