عادل راجہ سمیت دیگر ملزمان کو دو، دو مرتبہ عمر قید کی سزا سنا دی گئی ہے

انسداد دہشت گردی عدالت نے ریاستی اداروں کے خلاف ڈیجیٹل دہشت گردی سے متعلق مقدمے میں عادل راجا سمیت دیگر ملزمان کو دو، دو مرتبہ عمر قید کی سزا سنا دی ہے۔

9 مئی کے واقعات سے جڑے اس مقدمے کی سماعت انسداد دہشت گردی عدالت اسلام آباد میں ہوئی، جہاں اے ٹی سی کے جج طاہر عباس سپرا نے ٹرائل مکمل ہونے کے بعد محفوظ رکھا گیا فیصلہ سنایا۔

عدالت نے عادل راجا، حیدر مہدی اور وجاہت سعید کو دو مرتبہ عمر قید کی سزا دی، جبکہ صابر شاکر اور معید پیرزادہ کو بھی دو، دو بار عمر قید سنائی گئی۔ اس کے علاوہ مختلف دفعات کے تحت ملزمان کو مجموعی طور پر 35 سال قید اور 15 لاکھ روپے جرمانے کی سزا بھی دی گئی۔

سماعت کے دوران پراسیکیوشن نے مجموعی طور پر 24 گواہان پیش کیے۔ عدالت نے استغاثہ کی درخواست پر ملزمان کی غیر حاضری میں ٹرائل مکمل کیا۔ اس موقع پر پراسیکیوشن کی جانب سے راجا نوید حسین کیانی عدالت میں پیش ہوئے۔

عدالت نے تھانہ آبپارہ میں درج مقدمے میں صابر شاکر، معید پیرزادہ اور سید اکبر حسین کو عمر قید کی سزا سنائی، جبکہ تھانہ رمنا کے مقدمے میں شاہین صہبائی، حیدر مہدی اور وجاہت سعید کو سزائیں دی گئیں۔

کارروائی کے دوران ملزمان کی جانب سے ایڈووکیٹ گلفام اشرف گورائیہ عدالت میں پیش ہوئے، جنہیں عدالت نے سرکاری طور پر ملزمان کا وکیل مقرر کیا تھا۔ انسداد دہشت گردی قوانین کے تحت عدالت کو یہ اختیار حاصل ہے کہ ملزمان کی عدم موجودگی میں بھی مقدمے کی سماعت اور فیصلہ کیا جا سکے۔