خیبر پختونخوا کے مسائل سے آگاہ ہیں، دائرہ اختیار میں رہ کر حل کریں گے : وزیراعظم

وزیراعظم شہباز شریف نے کہا ہے کہ وہ خیبر پختونخوا کے عوام کو درپیش مسائل سے پوری طرح آگاہ ہیں اور وفاقی حکومت اپنے آئینی دائرۂ اختیار میں رہتے ہوئے ان مسائل کے حل کے لیے عملی اقدامات کر رہی ہے۔

خیبر پختونخوا سے تعلق رکھنے والے عوامی نمائندوں سے ملاقات کے دوران وزیراعظم کا کہنا تھا کہ عوامی مشکلات کا ازالہ وفاقی حکومت کی اولین ترجیحات میں شامل ہے، جبکہ صوبے میں جاری وفاقی ترقیاتی منصوبوں کو بروقت مکمل کرنا بھی حکومت کی ترجیح ہے۔

ملاقات میں شریک نمائندوں نے وزیراعظم کو آگاہ کیا کہ خیبر پختونخوا کی صوبائی حکومت بری طرح ناکام ہو چکی ہے اور گورننس کا فقدان ہے۔ ان کا کہنا تھا کہ صحت، تعلیم، بنیادی ڈھانچے اور عوامی فلاح کے شعبوں میں کوئی واضح حکمتِ عملی موجود نہیں، جبکہ صوبائی حکومت عوامی مسائل کو نظر انداز کر رہی ہے۔