لاہور: پنجاب پولیس نے سوشل میڈیا پر فیک نیوز، جھوٹے مواد اور کردار کشی میں ملوث صارفین کیلئے سخت انتباہ جاری کر دیا ہے۔
ترجمان پنجاب پولیس کے مطابق سوشل میڈیا پر کسی بھی فرد یا ادارے کے خلاف غلط، من گھڑت اور غیر مصدقہ معلومات پھیلانا قابلِ دست اندازی جرم ہے۔ انہوں نے کہا کہ ویور شپ یا فالوورز بڑھانے کیلئے فیک نیوز، اے آئی سے تیار کردہ میمز اور ویڈیوز کا استعمال کرنے والے افراد قانون کی گرفت میں آ سکتے ہیں۔
ترجمان کا کہنا تھا کہ سوشل میڈیا پر جھوٹی خبر، مواد کو ری ٹویٹ، فارورڈ یا کسی بھی شکل میں تشہیر کرنا بھی فیک نیوز پھیلانے کے زمرے میں آتا ہے۔ انہوں نے واضح کیا کہ اگرچہ آئینِ پاکستان کا آرٹیکل 19 شہریوں کو آزادیٔ اظہار رائے کا حق دیتا ہے، تاہم یہ آزادی کسی فرد، عدلیہ، ریاست، ملکی سلامتی اور سیکیورٹی اداروں کے خلاف ہرزہ سرائی اور کردار کشی کی اجازت نہیں دیتی۔
پنجاب پولیس کے مطابق من گھڑت، جھوٹی اور غیر مصدقہ خبروں یا مواد کی تشہیر پر قانون فوری حرکت میں آئے گا۔ ترجمان نے شہریوں سے اپیل کی ہے کہ وہ سوشل میڈیا پر فیک نیوز، پوسٹس، اے آئی میمز اور ویڈیوز پھیلانے سے گریز کریں اور ذمہ دار شہری ہونے کا ثبوت دیں
