ایران کے آرمی چیف میجر جنرل امیر حاتمی نے امریکا اور اسرائیل کو سخت وارننگ دیتے ہوئے کہا ہے کہ ایران کی مسلح افواج ہائی الرٹ ہیں اور دشمن کی کسی بھی غلطی کی صورت میں نہ صرف پورے خطے بلکہ صہیونی ریاست کی سلامتی بھی شدید خطرے میں پڑ جائے گی۔
غیر ملکی میڈیا کے مطابق ایرانی آرمی چیف نے کہا کہ ایران آج اسرائیل کے ساتھ 12 روزہ جنگ کے مقابلے میں کہیں زیادہ طاقتور، منظم اور باصلاحیت ہو چکا ہے۔ انہوں نے واضح کیا کہ ایرانی فوج ہر قسم کی جارحیت کا منہ توڑ جواب دینے کی مکمل صلاحیت رکھتی ہے۔
میجر جنرل امیر حاتمی کا کہنا تھا کہ ایران کی جوہری سائنس اور ٹیکنالوجی کو کسی صورت ختم نہیں کیا جا سکتا۔ انہوں نے کہا کہ اگرچہ قوم کے سائنسدان اور فرزند شہید بھی ہو جائیں، تب بھی ایران کی جوہری صلاحیت قائم اور برقرار رہے گی۔
ایرانی آرمی چیف نے مزید کہا کہ دشمن ایران کے عزم، سائنسی ترقی اور دفاعی طاقت کو کمزور کرنے کے خواب دیکھنا چھوڑ دے، کیونکہ ایرانی قوم اور افواج ہر چیلنج کا مقابلہ کرنے کے لیے مکمل طور پر تیار ہیں۔
