زمبابوے کرکٹ ٹیم کے سابق کپتان ٹاٹینڈا ٹائبو نے کہا ہے کہ بابر اعظم کی بیٹنگ جذبات میں کی جانے والے شاعری ہے۔
ٹاٹینڈا ٹائبو نے نجی ٹی وی چینل سے خصوصی گفتگو کرتے ہو ئے کہا کہ کسی کو تیکنیک سکھانی ہے تو پاکستان کرکٹ ٹیم کے کپتان بابر اعظم کی بیٹنگ دکھائیں جن کی بیٹنگ دیکھ کر مزہ آتا ہے، بابر اعظم تکنیکی طور پر بہت مضبوط ہیں۔
سابق وکٹ کیپر بیٹر ٹاٹینڈا ٹائبو ان دنوں نیشنل کرکٹ اکیڈمی میں کوچنگ کیمپس میں کوچنگ کر رہے ہیں۔
زمبابوے کے سابق کپتان نے کہا کہ ایک بار پھر پاکستان آ کر لطف اندوز ہو رہا ہوں، پہلے کھلاڑی کی حیثیت سے آیا، اب میں یہاں کوچنگ کر رہا ہوں، جس ملک سے ماضی میں آپ کا تعلق رہا ہو اور عرصۂ دراز کے بعد دوبارہ واپس آئیں تو اچھا لگتا ہے۔
انہوں نے کہا کہ میں کھیل سے زیادہ کوچنگ سے لطف اندوز ہو رہا ہوں، میں اپنا علم اور تجربہ دوسروں کو دے کر زیادہ اچھا محسوس کرتا ہوں۔
سابق وکٹ کیپر بیٹر نے کہا کہ کوچنگ کیمپ میں اچھا ٹیلنٹ ہے، پاکستان سمیت اس خطے میں بہت زیادہ ٹیلنٹ پایا جاتا ہے، میرا بیٹا بھی جلد پاکستان میں ٹیلنٹ دیکھنے کے لیے پہنچ رہا ہے، میں نے بیٹے سے کہا ہے کہ ٹیلنٹڈ لوگوں کو آ کر دیکھو، اسے یہاں آ کر ٹیلنٹڈ لوگوں کو دیکھنے سے بہت کچھ سیکھنے کا موقع ملے گا۔
