پشاور میں 9 مئی کے واقعات سے متعلق ویڈیوز اور آڈیو ویژول مواد کی فرانزک جانچ کا عمل مکمل کر لیا گیا ہے، جس میں وزیراعلیٰ خیبر پختونخوا سہیل آفریدی، کامران بنگش، تیمور جھگڑا اور عرفان سلیم کی ویڈیوز میں موجودگی کی تصدیق سامنے آئی ہے۔
پنجاب فرانزک سائنس لیبارٹری نے پشاور پولیس کی درخواست پر تفصیلی فرانزک تجزیہ کیا، جس کے بعد رپورٹ مرتب کر کے تھانہ شرقی پشاور کو ارسال کر دی گئی۔ رپورٹ تھانے کی جانب سے فراہم کردہ یو ایس بی میں موجود مواد کی بنیاد پر تیار کی گئی۔
فرانزک رپورٹ کے مطابق یو ایس بی میں شامل 16 ویڈیوز کا فریم بہ فریم معائنہ کیا گیا۔ متعدد ویڈیوز میں کسی قسم کی ایڈیٹنگ کے شواہد نہیں ملے، تاہم چند ویڈیوز میں لوگو اور تحریری مواد شامل کیے جانے کی نشاندہی کی گئی ہے۔
رپورٹ میں بتایا گیا ہے کہ وزیراعلیٰ سہیل آفریدی اور عرفان سلیم سے متعلق دو ویڈیوز میں کلپس کو جوڑنے کے آثار پائے گئے۔ سہیل آفریدی کی پروفائل تصویر کا 9 مئی کی ویڈیو میں موجود فرد سے تقابلی جائزہ لیا گیا، جس سے دونوں کے ایک ہی شخص ہونے کی تصدیق ہوئی۔
اسی طرح عرفان سلیم، کامران بنگش اور تیمور جھگڑا کی پروفائل تصاویر کا ویڈیوز میں نظر آنے والے افراد سے موازنہ کیا گیا، جس کے نتیجے میں تمام کیسز میں واضح مطابقت سامنے آئی۔
فرانزک رپورٹ کے متن کے مطابق یہ تجزیہ صرف ویژول مواد تک محدود رکھا گیا، جبکہ رپورٹ کی تیاری کا عمل 19 دسمبر سے 23 دسمبر 2025 کے دوران مکمل کیا گیا۔
واضح رہے کہ انسداد دہشتگردی عدالت نے ریڈیو پاکستان حملہ کیس میں پولیس سے فرانزک رپورٹ طلب کی تھی، جس کے بعد ویڈیوز کے تجزیے کے لیے مواد پنجاب فرانزک سائنس لیبارٹری کو ارسال کیا گیا تھا
