اسلام آباد: جمعیت علمائے اسلام (جے یو آئی) کے سینیٹر کامران مرتضیٰ نے انکشاف کیا ہے کہ محمود خان اچکزئی کو قومی اسمبلی میں اپوزیشن لیڈر نواز شریف کے کہنے پر بنایا گیا۔
سینیٹر کامران مرتضیٰ کے مطابق محمود خان اچکزئی نے براہ راست مسلم لیگ (ن) کے قائد نواز شریف سے رابطہ کیا، جس کے بعد ان کی سفارش پر اپوزیشن لیڈر کی تقرری عمل میں آئی۔
انہوں نے کہا کہ نواز شریف نے اس فیصلے کے ذریعے اپنے اندر کے غصے کا اظہار کیا ہے، تاہم یہ قدم آنے والے دنوں میں ایک وسیع تر میثاقِ جمہوریت کی بنیاد بھی بن سکتا ہے۔
سینیٹر کامران مرتضیٰ کا کہنا تھا کہ محمود خان اچکزئی جے یو آئی کے بھی اپوزیشن لیڈر ہیں اور ان کی تقرری کا مطالبہ جے یو آئی کی جانب سے بھی کیا گیا تھا۔
انہوں نے مزید کہا کہ جس طرح قومی اسمبلی میں اپوزیشن لیڈر کا تقرر کیا گیا ہے، اسی طرح سینیٹ میں بھی اپوزیشن لیڈر کا تقرر ہونا چاہیے تاکہ پارلیمانی اور سیاسی عمل میں توازن قائم رکھا جا سکے۔
