بھارتی میڈیا کے مطابق گریٹر نوئیڈا کے علاقے بسرکھ میں واقع پیرا ماؤنٹ ایموشنز سوسائٹی میں پیش آنے والے افسوسناک واقعے میں ایک سافٹ ویئر انجینئر نے مبینہ طور پر اپنی سالی پر چاقو سے حملہ کرنے کے بعد 16ویں منزل سے کود کر خودکشی کر لی۔
پولیس کے مطابق 38 سالہ شتروگھن سنہا کا اپنی اہلیہ سے کسی بات پر شدید جھگڑا ہوا، جس کے دوران اس نے مبینہ طور پر بیوی پر حملے کی کوشش کی۔ اسی اثنا میں سالی نے مداخلت کی تو شتروگھن سنہا نے سبزی کاٹنے والے چاقو سے اس پر وار کر دیا، جس کے نتیجے میں اس کے ہاتھ پر گہرے زخم آئے اور شدید خون بہنے لگا۔
پولیس کا کہنا ہے کہ جب شتروگھن سنہا کی اہلیہ نے اپنی بہن کو زخمی حالت میں دیکھا تو اس نے فوری طور پر پولیس کو اطلاع دینے کے لیے کال کی۔ اس دوران شتروگھن سنہا بدنامی کے خوف سے گھبرا گیا اور خود کو کمرے میں بند کر لیا۔ بعد ازاں جب اہلیہ اور سالی نے دروازہ کھولنے اور پولیس کے آنے کی بات کی تو وہ خوفزدہ ہو گیا اور بالکونی سے چھلانگ لگا دی، جس کے باعث وہ موقع پر ہی ہلاک ہو گیا۔
پولیس کے مطابق زخمی سالی کو فوری طبی امداد فراہم کی گئی اور اب اس کی حالت خطرے سے باہر بتائی جا رہی ہے، جبکہ شتروگھن سنہا کی لاش کو پوسٹ مارٹم کے لیے بھجوا دیا گیا ہے۔
ابتدائی تحقیقات میں سامنے آیا ہے کہ شتروگھن سنہا گزشتہ چھ ماہ سے بے روزگار تھا اور شدید ذہنی دباؤ کا شکار تھا۔ پولیس کا کہنا ہے کہ واقعے سے قبل اس نے شراب بھی پی ہوئی تھی، جبکہ پڑوسیوں کے مطابق میاں بیوی کے درمیان اکثر جھگڑے رہتے تھے۔
پولیس کے مطابق شتروگھن سنہا ایک آئی ٹی کمپنی میں سافٹ ویئر انجینئر تھا، اس کی شادی کو تقریباً 11 سال ہو چکے تھے اور اس کا ایک 8 سالہ بیٹا بھی ہے۔ پولیس نے بتایا کہ اس کی اہلیہ بھی ایک آئی ٹی کمپنی میں بطور سافٹ ویئر انجینئر کام کرتی ہیں
