پاک فوج کی گاڑی پر دہشت گردوں کی فائرنگ

شمالی وزیرستان میں پاک فوج کی گاڑی پر دہشت گردوں کی فائرنگ کے نتیجے میں2اہلکار شہید ہوگئے۔ آئی ایس پی آر کے مطابق شہدا میں سیکنڈ لیفٹیننٹ عبدالمعید اور سپاہی بشارت شامل ہیں۔
پاک فوج کے شعبہ تعلقات عامہ (آئی ایس پی آر) کے مطابق 21 سال کے سکینڈ لیفٹیننٹ عبدالمعید کا تعلق بوریوالہ ضلع وہاڑی سے ہے ،انہوں نے حال ہی میں پی ایم اے کورس پاس کیا تھا۔
آئی ایس پی آر کے مطابق شہید ہونے والے دوسرے جوان سپاہی بشارت کا تعلق گلگت کے گاؤں دینور سے ہے۔
دوسری جانب وزیراعلیٰ بلوچستان نواب ثناءاللہ زہری نے شمالی وزیرستان میں دہشت گردوں کی فائرنگ کے واقعہ کی شدید مذمت کی ہے۔
ایک بیان میں وزیراعلیٰ بلوچستان نے واقعے پرافسوس کرتے ہوئے شہداء کے خاندانوں سےتعزیت اور ہمدردی کا اظہار کیا ہے۔
نواب ثناء اللہ زہری نے کہا ہے کہ دہشت گردی کے خلاف جنگ میں جانوں کے نذرانے پیش کرنے والے قوم کے ہیرو ہیں۔