چیف آف ڈیفنس فورسز فیلڈ مارشل سید عاصم منیر نے کرسمس کی تقریبات میں شرکت کر کے مسیحی برادری کو تہہ دل سے کرسمس کی مبارکباد دی اور ان کے لیے امن، خوشحالی اور ہم آہنگی کی دعا کی۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے راولپنڈی کے کرائسٹ چرچ میں منعقدہ کرسمس کی تقریب میں شرکت کی، جہاں انہوں نے مسیحی برادری کے ساتھ خوشیوں کے لمحات بانٹے۔
آئی ایس پی آر کے مطابق فیلڈ مارشل نے اس موقع پر قائداعظم محمد علی جناح کو خراجِ عقیدت پیش کیا اور ان کے مساوات، آزادی اور مذہبی رواداری پر مبنی وژن کو اجاگر کیا۔ انہوں نے کہا کہ اقلیتوں کے حقوق کا تحفظ پاکستان کے نظریے کی بنیادی اساس ہے۔
تقریب کے دوران فیلڈ مارشل عاصم منیر نے شرکاء سے گفتگو کرتے ہوئے قومی ترقی اور سلامتی میں پاکستانی مسیحیوں کی خدمات کو سراہا اور بین المذاہب ہم آہنگی، باہمی احترام اور قومی اتحاد کی اہمیت پر زور دیا۔
آئی ایس پی آر کے مطابق فیلڈ مارشل نے کہا کہ پاکستان کی اصل قوت آئینی اقدار اور مساوی مواقع میں مضمر ہے، جو مذہب، نسل، ذات اور عقیدے سے بالاتر ہیں۔ انہوں نے شہریوں کی عزت، سلامتی اور مساوی حقوق کے تحفظ کے لیے افواجِ پاکستان کے پختہ عزم کا بھی اعادہ کیا۔
آئی ایس پی آر کے مطابق مسیحی برادری کے رہنماؤں نے فیلڈ مارشل کے دورے پر ان کا شکریہ ادا کیا اور وطن کے دفاع، مذہبی ہم آہنگی اور قومی یکجہتی کے فروغ میں پاک فوج کے کردار کو سراہا۔
[contact-form][contact-field label="Name" type="name" required="true" /][contact-field label="Email" type="email" required="true" /][contact-fiel...