سندھ کے ضلع لاڑکانہ میں جرائم پیشہ عناصر نے پولیس کی رِٹ کو چیلنج کرتے ہوئے ایک بڑی واردات انجام دے دی، جہاں ڈاکوؤں نے 20 سے زائد زیرِ تربیت پولیس اہلکاروں کو لوٹ لیا۔
میڈیا رپورٹس کے مطابق یہ واقعہ رتوڈیرو کے قریب پیش آیا، جہاں چھٹیوں کے بعد پولیس ٹریننگ سینٹر لاڑکانہ واپس جانے والے 21 زیرِ تربیت اہلکار مسلح ڈاکوؤں کا نشانہ بن گئے۔ ملزمان نے اہلکاروں کو گھیرے میں لے کر ان سے موبائل فونز، نقد رقم اور دیگر قیمتی سامان چھین لیا اور موقع سے فرار ہو گئے۔
واقعے کی اطلاع ملتے ہی پولیس میں کھلبلی مچ گئی۔ ایس ایس پی لاڑکانہ احمد فیصل کے مطابق اطلاع ملتے ہی پولیس ٹیمیں جائے وقوعہ کی جانب روانہ کر دی گئیں، جبکہ ملزمان کی گرفتاری کے لیے سرچ آپریشن شروع کر دیا گیا ہے۔
پولیس حکام کا کہنا ہے کہ واقعے کی مختلف پہلوؤں سے تحقیقات جاری ہیں، جبکہ ڈاکوؤں کی تلاش کے لیے متعدد علاقوں میں ناکہ بندیاں بھی کی جا رہی ہیں۔ حکام کا دعویٰ ہے کہ ملزمان کو جلد قانون کے کٹہرے میں لایا جائے گا۔
یہ واقعہ سندھ میں بڑھتے ہوئے جرائم اور پولیس اہلکاروں کی سیکیورٹی پر سنگین سوالات کھڑے کرتا ہے، خصوصاً ایسے وقت میں جب صوبائی حکومت کچے کے علاقوں میں ڈاکوؤں کے خلاف بڑے آپریشن کا اعلان کر چکی ہے۔
