ضمنی انتخابات میں پاکستان مسلم لیگ (ن) نے میدان مار لیا۔ اپنے رہنماوں کی چھوڑی ہوئی تمام نشستوں پر برتری حاصل کرلی۔ گجرات میں صوبائی اسمبلی کی نشست پر چوہدری پرویز الہٰی کو بھتیجے موسیٰ الہٰی نے عبرتناک شکست دے دی۔
لاہور سے شہباز شریف کی خالی کردہ نشست سے ن لیگ کے راشد منہاس نے سنی اتحاد کونسل کے یوسف میو کو شکست دی۔ شیخوپورہ سے مسلم لیگ (ن) کے رانا افضال حسین جیت گئے، نارووال میں احسن اقبال کے بیٹے احمد اقبال کامیاب ہو چکے۔
بھکر سے ن لیگ کے سعید اکبر نوانی نے آزاد امیدوار افضل ڈھانڈلہ کو ہرایا، بلاول بھٹو کی خالی کردہ قنبر شہداد کوٹ کی نشست پر پیپلز پارٹی کے خورشید جونیجو کامیاب ہوگئے۔ انہوں نے 91 ہزار 581 ووٹ حاصل کیے جبکہ ان کے مقابل تحریک لبیک کے محمد علی صرف 2763 ووٹ حاصل کر کے ضمانت ضبط کروا بیٹھے۔
ڈیرہ اسماعیل خان میں علی امین گنڈاپور کے بھائی فیصل امین آگے ہیں، کوہاٹ سے بھی سنی اتحاد کونسل آگے جبکہ باجوڑ میں اپ سیٹ کا امکان ہے۔
پی ٹی آئی حمایت یافتہ امیدوار پر آزاد امیدوار مبارک زیب نے واضح برتری حاصل کر لی۔ لسبیلہ سے مسلم لیگ ن اور قلعہ عبداللّٰہ سے پشتونخوا میپ کا امیدوار آگے۔
ملک کے مختلف علاقوں میں ضمنی انتخابات کے لیے آج پولنگ ہوئی جس کے غیر حتمی و غیر سرکاری نتائج آنے کا سلسلہ جاری ہے۔
قومی اسمبلی کی 5 اور صوبائی اسمبلی کی 16 نشستوں پر ووٹنگ کا عمل صبح 8 بجے شام 5 بجے تک بلاتعطل جاری رہا۔
قومی اسمبلی کے جن حلقوں میں ضمنی انتخاب کے سلسلے میں پولنگ ہوئی ان میں پنجاب کے 2، خیبر پختونخوا کے 2 اور سندھ کا 1 حلقہ شامل ہے۔
صوبائی اسمبلیوں کی جن نشستوں پر ضمنی الیکشن ہوا ان میں پنجاب اسمبلی کی 12، بلوچستان اور سندھ کی 2، 2 نشستیں شامل ہیں۔
