پاکستان اور بنگلہ دیش کے فضائی سربراہان کا جے ایف 17 تھنڈر طیاروں کی خریداری پر تبادلۂ خیال

پاکستان اور بنگلہ دیش کے فضائی سربراہان نے جے ایف 17 تھنڈر طیاروں کی ممکنہ خریداری پر تفصیلی تبادلۂ خیال کیا، آئی ایس پی آر۔

پاک فوج کے شعبۂ تعلقاتِ عامہ (آئی ایس پی آر) کے مطابق پاکستان اور بنگلہ دیش کے ایئر چیفس کے درمیان جے ایف 17 تھنڈر ملٹی رول فائٹر طیاروں کی ممکنہ خریداری پر تفصیلی گفتگو ہوئی۔

جے ایف 17 تھنڈر ایک کثیر المقاصد لڑاکا طیارہ ہے جسے چین اور پاکستان نے مشترکہ طور پر تیار کیا ہے۔ یہ طیارہ 2019 اور 2025 میں بھارت کے ساتھ ہونے والی دو فوجی جھڑپوں کے دوران اپنی جنگی صلاحیتیں ثابت کر چکا ہے۔

آئی ایس پی آر کی جانب سے جاری کردہ پریس ریلیز کے مطابق بنگلہ دیش ایئر فورس کے سربراہ ایئر چیف مارشل حسن محمود خان نے اسلام آباد میں پاکستان ایئر فورس (پی اے ایف) کے سربراہ ایئر چیف مارشل ظہیر احمد بابر سدھو سے ملاقات کی۔

پریس ریلیز میں بتایا گیا کہ بنگلہ دیشی فضائی سربراہ ایک اعلیٰ سطحی دفاعی وفد کی قیادت کر رہے تھے۔

بیان کے مطابق ملاقات میں آپریشنل تعاون اور ادارہ جاتی ہم آہنگی کو مضبوط بنانے پر توجہ دی گئی، جس میں تربیت، صلاحیتوں میں اضافہ اور ایرو اسپیس ترقی میں تعاون پر خصوصی زور دیا گیا۔

آئی ایس پی آر کے مطابق مہمان ایئر چیف کو گارڈ آف آنر بھی پیش کیا گیا۔

ایئر چیف مارشل ظہیر احمد بابر سدھو نے اپنے بنگلہ دیشی ہم منصب کو پی اے ایف کی حالیہ پیش رفت سے آگاہ کیا اور بنگلہ دیش ایئر فورس کو بنیادی سے لے کر جدید پروازوں اور خصوصی کورسز تک جامع تربیتی فریم ورک کے تحت تعاون کی یقین دہانی کرائی۔

انہوں نے سپر مشّاق تربیتی طیاروں کی تیز تر فراہمی، مکمل تربیتی نظام اور طویل المدتی معاونت کے انتظام کی بھی یقین دہانی کرائی۔

بیان کے مطابق بنگلہ دیشی فضائی سربراہ نے پی اے ایف کے شاندار جنگی ریکارڈ کو سراہا اور اس کی آپریشنل مہارت سے فائدہ اٹھانے میں دلچسپی کا اظہار کیا۔ انہوں نے بنگلہ دیش ایئر فورس کے پرانے بیڑے کی دیکھ بھال میں معاونت اور فضائی نگرانی کو بہتر بنانے کے لیے ایئر ڈیفنس ریڈار سسٹمز کے انضمام میں مدد کی خواہش بھی ظاہر کی۔

آئی ایس پی آر کے مطابق ملاقات میں جے ایف 17 تھنڈر طیاروں کی ممکنہ خریداری پر بھی تفصیلی گفتگو ہوئی، جبکہ وفد نے پی اے ایف کی اہم تنصیبات کا دورہ بھی کیا۔

بیان کے اختتام پر کہا گیا کہ یہ دورہ پاکستان اور بنگلہ دیش کے درمیان مضبوط تاریخی تعلقات کا عکاس ہے اور دفاعی تعاون کو مزید گہرا کرنے اور طویل المدتی اسٹریٹجک شراکت داری قائم کرنے کے مشترکہ عزم کی عکاسی کرتا ہے۔