پاکستان نیوی نے زمین سے فضا تک مار کرنے والے جدید میزائل کا کامیاب تجربہ کر لیا ہے۔ انٹر سروسز پبلک ریلیشنز (آئی ایس پی آر) کے مطابق یہ تجربہ پاک بحریہ کے مؤثر ایئر ڈیفنس سسٹم اور دفاعی صلاحیتوں کا عملی مظہر ہے۔
آئی ایس پی آر کا کہنا ہے کہ ایل وائی 80 میزائل نے طویل فاصلے پر فضائی ہدف کو کامیابی سے نشانہ بنایا۔ اس موقع پر کمانڈر پاکستان فلیٹ نے میزائل تجربے کا معائنہ کیا اور پاک بحریہ کے افسران، سائنسدانوں اور انجینئرز کی پیشہ ورانہ مہارت کو سراہا۔
اس حوالے سے وفاقی وزیر داخلہ محسن نقوی نے کہا ہے کہ پاکستان نے دفاعی میدان میں ایک اور بڑی کامیابی حاصل کی ہے۔ ان کا کہنا تھا کہ فیلڈ مارشل سید عاصم منیر اور نیول چیف ایڈمرل نوید اشرف کی قیادت میں یہ کامیاب تجربہ دفاعی شعبے میں ایک اہم سنگِ میل ہے۔ محسن نقوی نے میزائل کے کامیاب تجربے پر پوری قوم کو مبارکباد دیتے ہوئے کہا کہ پاک بحریہ کے سائنسدانوں اور انجینئرز نے شاندار کارنامہ سرانجام دیا ہے، جو سمندری سرحدوں کے مضبوط اور قابلِ اعتماد دفاع کی ضمانت ہے۔
ادھر وزیراعلیٰ سندھ مراد علی شاہ نے بھی پاک بحریہ کی پیشہ ورانہ صلاحیتوں اور مقامی ٹیکنالوجی کو قابلِ تحسین قرار دیا۔ انہوں نے کہا کہ ایل وائی 80 میزائل کا کامیاب تجربہ دشمن کے لیے واضح پیغام ہے کہ پاکستان اپنی قومی سلامتی پر کوئی سمجھوتہ نہیں کرے گا۔ وزیراعلیٰ سندھ نے قومی دفاع کے لیے خدمات انجام دینے والے سائنسدانوں اور مسلح افواج کو خراجِ تحسین پیش کیا۔
یہ کامیاب میزائل تجربہ نہ صرف پاکستان کی دفاعی خودکفالت کی جانب ایک مضبوط قدم ہے بلکہ خطے میں اس کی دفاعی صلاحیتوں کو مزید مستحکم کرتا ہے
پاکستان کے ایئر چیف سے ملاقات میں عراقی فضائیہ کے کمانڈر نے جے ایف 17 تھنڈر لڑاکا طیاروں میں ’’گہری دلچسپی‘‘ کا اظہار کیا اور پاکستان فضائیہ (پی ا...