ایران کے سپریم لیڈر آیت اللّٰہ علی خامنہ ای نے امریکا کے صدر ڈونلڈ ٹرمپ کو سخت وارننگ دیتے ہوئے کہا ہے کہ فرعون، نمرود اور رضا شاہ کے ساتھ جو انجام ہوا، وہی ٹرمپ کا بھی ہو گا۔
ایک بیان میں آیت اللّٰہ خامنہ ای نے کہا کہ غرور میں ڈوبا ہوا ایک شخص آج پوری دنیا کے فیصلے کر رہا ہے، لیکن اسے یہ سمجھنا چاہیے کہ اقتدار کے عروج پر موجود طاقتور ترین حکمرانوں کے ساتھ تاریخ نے کیا سلوک کیا۔
دوسری جانب ایرانی صدر مسعود پزشکیان نے ایران میں جاری فسادات کا ذمہ دار امریکا اور اسرائیل کو قرار دے دیا ہے۔
ایرانی میڈیا کو انٹرویو دیتے ہوئے صدر مسعود پزشکیان نے کہا کہ امریکا اور اسرائیل لوگوں کو ہدایات دے رہے ہیں کہ وہ تخریب کاری کریں، یہ وہی قوتیں ہیں جنہوں نے ایران پر حملے کیے۔
ایرانی صدر کا کہنا تھا کہ کسی غیر ملکی طاقت کو قوم کے اندر انتشار کے بیج بونے کی اجازت نہیں دی جائے گی اور ایران اپنی خودمختاری پر کوئی سمجھوتہ نہیں کرے گا۔
دوسری طرف امریکا کے صدر ڈونلڈ ٹرمپ نے دعویٰ کیا ہے کہ ایران مذاکرات کرنا چاہتا ہے اور ملاقات کے انتظامات کیے جا رہے ہیں۔
ٹرمپ نے کہا کہ ایران کے خلاف بہت طاقتور آپشنز پر غور کیا جا رہا ہے۔
ایران اور امریکا کے درمیان بڑھتی کشیدگی کے باعث خطے کی صورتحال مزید حساس ہوتی جا رہی ہے
