سابق وزیر داخلہ چوہدری نثار علی خان نے کہا ہے کہ مسلم لیگ (ن) میں اختلاف رائے ضرور ہے لیکن کوئی دھڑے بندی نہیں۔چوہدری نثار نے یہ بات کلر سیداں میں میڈیا سے گفتگو کرتے ہوئے کہی اور ساتھ یہ بھی کہا کہ (ن) لیگ پاکستان کی سب سے بڑی سیاسی جماعت ہے جو اس وقت مسائل اور مشکلات کا شکار ہے، لیکن پارٹی ان مشکلات سے نبرد آزما ہوگی اور آئندہ الیکشن میں مکمل طور پر متحد ہوجائے گی۔انہوں نے مزید کہا کہ حکمراں پارٹی میں کوئی فارورڈ بلاک نہ ہے اور نہ ہی بنے گا، البتہ اختلاف رائے ضرور ہے جو جمہوریت کی روح ہےاور جو لوگ فاروڈ بلاک کی باتیں کر رہے ہیں وہ پارٹی کے ہمدرد نہیں۔ان کا کہنا تھا کہ میرے نزدیک مال و دولت کی نہیں بلکہ کردارکی اہمیت ہےکیونکہ عہدے اور حکومتیں آنے جانے والی چیزیں ہیں لیکن کوشش کرتا ہوں ایسا کام نہ کروں جس سے میرے کردار پر کوئی انگلی اٹھاسکے اور 2018 الیکشن کے بعد میں کس پوزیشن میں کھڑا ہوں گا یہ الیکشن کے بعد معلوم ہو گا۔سابق وزیر داخلہ نےبتایا کہ انہیں اپنی حکومت کا بھارت سے دوستیاں بڑھانا اچھا نہیں لگتا، اسلام اور پاکستان دشمن سے خیر کی توقع خود کو دھوکہ دینے کے مترادف ہے۔چوہدری نثار نے کہا کہ ہمیں مودی کے دور حکومت میں پاکستان میں خیر کی توقع نہیں رکھنی چاہیے، خطرات اندرونی ہوں یا بیرونی قوم کو متحد ہونا چاہیےتاہم پاکستان کےحالات میں وقتی طور پر ٹھہراؤ ضرور آیا ہے لیکن خطرات کم نہیں ہوئے۔
