وفاقی وزیر قانون زاہد حامد کا کہنا ہےکہ بڑی جماعتیں نیب ختم کرکے اس کی جگہ احتساب کمیشن کے قیام پر متفق ہوگئی ہیں۔
وزیر قانون زاہد حامد کی سربراہی میں نیب قوانین کے حوالے سے پارلیمانی کمیٹی کا اجلاس ہوا۔
اجلاس میں زاہد حامد نے مزید کہا کہ پیپلز پارٹی نے ججوں اور جرنیلوں کو احتساب کمیشن کے دائرہ کار میں لانے کی تجویز مسترد کردی ہے۔
انہوں نے کہا کہ تمام بڑی جماعتوں کا نیب ختم کرکے اس کی جگہ احتساب کمیشن لانے پر اتفاق ہے، تاہم جماعت اسلامی اور تحریک انصاف نے ترامیم کی صورت میں اپنے کچھ خدشات کا اظہار کیا ہے۔
وزیر قانون نے مزید کہا کہ نیب قوانین زیادہ سخت ہونے کی وجہ سے نیب ختم کرکے اس کی جگہ احتساب کمیشن بنایا جارہا ہے جس کے لیے تمام بڑی سیاسی جماعتوں کی حمایت حاصل ہے۔
انہوں نے یہ بھی کہا کہ نیب کیسز اور تحقیقات ختم نہیں کی جا رہیں، نیب کی تمام انکوائریاں نئے احتساب کمیشن کو جبکہ زیر التواء مقدمات نئی عدالتوں کو بھجوائے جائیں گے۔
